Gisugdan na sa gobyerno ang pagtukod sa kaugalingong strategic petroleum stockpile sa Pilipinas human maapektuhan ang suplay ug presyo sa lana tungod sa tensiyon sa Middle East.
Matud ni Energy Secretary Sharon Garin, ang panagbangi tali sa Iran ug Estados Unidos nagpakita sa panginahanglan sa mas lig-on nga seguridad sa enerhiya sa nasud, ilabina nga dako ang pagsalig sa Pilipinas sa imported nga petrolyo.
Ubos sa plano, tukoron sa Philippine National Oil Company (PNOC) ang mga pasilidad alang sa pagtipig sa reserbang lana nga molabaw sa kasamtangang imbentaryo sa mga pribadong kompanya sa industriya.
Tumong niini nga makahatag og dugang nga proteksiyon ug kasigurohan sa suplay sa lana sa panahon sa krisis o kalit nga pagkabalda sa internasyonal nga merkado.
Gibanabana nga mokabat sa 500,000 ka bariles ang unang stockpile nga nagkantidad og hapit P5 bilyon, lakip ang pagtukod sa mga tangke, pipeline, pantalan, ug ubang imprastraktura.
Sumala sa Department of Energy (DOE), nakigkoordinar na usab ang gobyerno sa PNOC ug Maharlika Investment Corp. aron mahuman ang kasabutan sulod sa bulan, nga sundan dayon sa feasibility study ug site evaluation.
Plano usab sa administrasyon nga padak-on pa ang reserba aron madugangan ang kasamtangang 30 hangtod 60 ka adlaw nga imbentaryo sa mga pribadong kompanya ug makadugang pa og kapin 30 ka adlaw nga buffer stock alang sa nasud.
