Nagpahigayon ang San Isidro Local Government Unit pinaagi sa Municipal Agriculture Office ug sa pakigtambayayong sa Provincial Agriculture Office og sunod-sunod nga mga kalihokan kagahapong adlawa aron mapalambo pa ang sektor sa agrikultura ug pagpangisda sa lungsod.
Isip kabahin sa padayong pagpatuman sa KADIWA Program, gipadangat ngadto sa mga residente ang mas barato nga bugas ug uban pang produktong agrikultural pinaagi sa mga display ug baligya nga gihimo sa Barangay Baon ug Barangay La Union.
Tumong sa maong programa ang pagsiguro nga adunay barato nga pagkaon ang mga lumulupyo samtang gisuportahan usab ang mga lokal nga mag-uuma pinaagi sa paghatag kanila og direkta nga merkado alang sa ilang mga produkto.Padayon usab ang KADIWA rollout karong adlawa sa Barangay Bitaogan ug Barangay Talisay aron mas daghan pang mga residente ang makabenepisyo sa programa.
Samtang, mitambong usab ang mga miyembro sa Tuburan Village Muslim Fisherfolk Association sa duha ka adlaw nga Level 1 Training ubos sa Rural Entrepreneurship Advocacy for Change o REACH Program.
