DAVAO CITY – Nagbahad si Davao City Mayor Inday Sara Duterte-Carpio ngadto sa mga wala mitamud sa enhanced community quarantine ilabi na kadtong nagalatas sa mga dalan nga pribadong sakyanan nga dili bayaran sa gobyerno ang ilang hospital bill sa higayon nga matakdan ug covid-19.
Kini ang nahimong pahayag sa Mayor human nga namatikdan nga aduna pa gihapoy nga nagsuroy-suroy bisan nga gipatuman ang ECQ.
Sumala sa Mayor nga kung adunay pasyente nga matakdan ug Covid-19 atol sa ECQ, himuon sumala pa ang contact tracing kung asa niini nakuha ang virus ug kung masayran nga nagsuroy-suroy kini, dili tubagon sa kagamhanan ang mga bayrunon niini sa hospital sa higayon nga ma-admit.
Kahinumduman nga kabahin sa mga polisiya sa ECQ ang pagpabilin lamang sa panimalay ug dili mogawas ilabi na kung dili kini mahinungdanon.
