Mga Higala Komusta Ug Maayong Buntag!
Nanawagan ang usa ka Davao base Marine biologist nga usa ka American National ngadto sa mga lideres sa atong dakbayan nga mukanaug sa ilahang katungdanan tungod sa ilahang kakulangan sa paghatag ug pagtagad sa mga nagkatag nga mga basura nga kabahin sa ilang kaakuhan isip mga tinugyanan ug dangpanan sa katawhan sa mga problema ilabi na sa basura.
Si Darell Baltchley usa ka langyaw nga nanimuyo na sa dugay’ng panahon dinhi sa syudad sa Dabaw ang wala ka pugong sa iyahang nakit-ang hugaw nga nagtapun-og sa kanal nga naglutawlutaw sakop sa usa ka Baranggay diha sa Trading Boulevard nga atbang lang sa iyahang gambalay.
Gibasol sa tag-iya sa Bone Museum ang mga lider tungod sa walay aksyon nga gihimo sa problema sa plastic nga mga basura.
Nagsugod ang maong kontrobersiya karong panahuna tungod sa pagpost sa usa ka langyaw ug hulagway sa social media nga naglutawlutaw nga daw nagpangamay kung kanus-a kini maukay ug mahipos sa mga hingtungdang ahensya, ilabi na sa mga tawo nga dunay konsensya ug dunay pagpangga sa atong kinaiyahan. Ug miani kini ug nagkadaiyang reaksyon sa gitawag nila ug netizen hangtod nga misangpot kini sa “hipos challenge” kay dunay usa ka netizen nga nagsugo kang Blatchley nga siya nlang ang mulimpyo niini. Ug wala sab niya kini balibari ug gikasa ang paghinlo sa pipila ka metros nga hugaw nga nagtapun-og ug naglutaw-lutaw hangtod nga nakahipos sila ug usa ka dump truck nga mga palstik nga basura.
Ang gihimo sa usa ka Datu Bago Awardee ang pagpakita lamang nga ang basuara sa atong dakbayan ang nagtapun-og na ug ngay na nga mulihok ang atong kagamhanan sa atong lokalidad aron masugpo na kining pagkatag sa mga plastik nga mga basura nga gipanglabay sa mga tawo nga walay konsensya nga ginatawag sa kadaghanan nga mga damak sa ilahang kaugalingon nga tugkaran, Ang mga nakitang basura diha sa nasampit nga baranggay usa lamang kini ka timailhan nga ang mga basura dinhi sa syudad usa na ka dakong problema ilabi na gyud sa mga urban area.. Nga kung imung hunahunaon dili lang kana nga baranggay ang apektado sa nagtapun-og nga mga basura kay bisan asa dinhi sa atong bahin sa syudad makita man nato gipanglabay sa mga tawong hugawan nga walay panglantaw sa kaayuhan sa atong kinaiyahan alang sa umaabot nga mga panahon ang mga basura bisan asa.
Dili man gyud ikalimod nga daghan na ang nagtapun-og nga mga basura sa atong syudad ug kini nagpasabot lang nga ang atong mga otoridad, mahimo ba natong tawgon nga sila nagpasagad? kulang lang gyud sila pag–implementa sa mga balaud nga gipanday dinhi sa atong lokalidad? Sabton ba nato nga kutob lang kita sa pahimangno o istorya nga dili ialabay ang mga basura bisan asa?. Dapat dili lamang nato isalig ang kahinlo sa atong palibot pinaagi sa paglabay sa basura sa saktong labayanan kay duna gyuy pipila nga mga HUGAWAN. Ug mao ni angay nilang hinuklugan karong panahon sa Semana Santa kung unsa ang atong nadugang nga pagdaot sa atong palibot. Kay kung kini mapasagdan sa mga hingtungdang ahensya sa atong kagamhanan dinhi sa dakbayan, kita lamang gihapon ang unang maapektuhan.
Sakto lang ang gihimo sa langyaw nga mga panawagan aron magsilbi kining pangpaukaw sa atong mga lideres sa dakbayan nga mulihok alang sa kahinlo sa atong palibot kay naila baya kita nga hinlo nga syudad apan kung imung susihon diay sa mga suok-suok sa dakbayan didto nimo makita ang ang nagtapun-og nga mga plastik nga basura. Dili na kita maghulat pa ug laing langyaw nga muhipos sa dili nila basura sa dili nila tugkaran kay alang nako usa kini ka dakong sagpa sa kamatuoran nga kitang mga lumulupyo ang wala kahinlo sa kaugalingon natong mga hugaw. Magbaton pud ta ug gamay”ng kaulaw tungod sa gibuhat sa usa ka langyaw…!!!
