Gipahayag ni Senate President Vicente “Tito” Sotto III nga dili obligado nga muatubang sa impeachment trial si Vice President Sara Duterte kung maaprobahan sa Senado ang impeachment articles batok kaniya, apan mas maayo kuno kung siya motambong.Sumala pa ni Sotto, base sa kasamtangang rules sa impeachment, walay probisyon nga mopugos sa usa ka akusadong opisyal nga motubag o motambong sa pag-atubang sa kaso.
Apan giingon niya nga “mas maayo nga motambong” aron mas sakto nga maipakita ang iyang bahin. Gikumpara usab niya ang sitwasyon sa nangaging impeachment cases, sama ni kanhing Pangulong Joseph Estrada nga wala nakatambong sa iyang pag-atubang sa kaso, ug ni kanhing Chief Justice Renato Corona nga personal nga miatubang sa Senado sa wala pa mahatagan og desisyon nga tangtangon sa puwesto.
Gipasiugda ni Sotto nga kung makaabot sa Senado ang impeachment articles, dayon kining i-report sa plenaryo ug ipasa sa committee on rules isip kabahin sa proseso.Dugang pa niini, plano niya nga magpatuman og pre-trial sa wala pa ang aktuwal nga impeachment trial aron malikayan ang kagubot sa pagpresentar sa ebidensya, base sa kasinatian sa Corona impeachment niadtong 2012.
Sa pagkakaron, giingon ni Sotto nga ang pre-trial gitugotan ubos sa impeachment rules ug importante kini aron mas hapsay ang dagan sa pagtuki sa kaso sa Senado.
