DAVAO CITY – Nakaplagan nga wala nay kinabuhi ang usa ka 17 anyos nga lalaki human kini malumos. Sumala sa report nga nakaylap sa patrol, kauban sa maong biktima ang lain pa nga duha ka lalake diin nasayran nga sila gikan namasol apan wala sila migamit og bangka mahitungod hunas kadtong panahona.
Dugang pa niana, misubay sila sa semento nga tulay apan sa dihang sila papauli na,kalit lamang nga misaka ang tubig inubanan sa kusog nga balud rason nga sila nangalumos diin milungtad sa 5 ka oras ang pagpangita sa menor de edad nga biktimang nailhan nga si Jeffrey Torillo, 17 anyos.
Atol sa pagkakita sa patay’ng lawas niini, nasayran usab nga paspas kining naanod sa bul-og sa tubig ngadto sa Purok Lapu-Lapu,Barangay San Pedro,siyudad sa Panabo.
Sa pikas bahin usab, nasalbar ang duha ka lain pa nga mga higala ni Torillo nga mao sila Michael Labuya, 25 anyos ug Nowel Asoque, 20 anyos.
Sa pagkakaron, anaa na sa morgue ang patay’ng lawas sa maong biktima. Samtang, gipahimangnuan ang tanan nga mag-amping ug di gayud mukumpyansa dayon ilabi na og anaa sa kadagatan tungod di gayud masuta og kanus-a musaka ang tubig.
Text by || Bombo Danica Baguio
