DAVAO CITY – Sikop ang usa ka lalaki atol sa hiniusang Anti-illegal Gambling operation nga gipahigayon sa mga sakop sa Talaingod Municipal Station sa Sitio Basak, Brgy. Sto Niño, Talaingod, Davao Del Norte alas 2:55 ang takna kagahapon.
Malampusong nasikop sa otoridad ang usa ka alyas Jerry, residente sa Sitio Baugan, Brgy Kalagangan, Bukidnon human nga nalambigit kini sa iligal nga sugal nga lokal nga nailhang “Hantak’’.
Samtang gawas kang alyas Jerry, nagpabiling gawasnon ang lain pang mga suspek nga giilang sila si alyas Loloy, hingkod ang pangidaron, residente sa Brgy. Motupi, Bukidnon; alyas Keejay, hamtong ang pangidaron, residente sa Brgy. Motupi, Bukidnon ug alyas Ronie, 48 anyos, minyo, residente sa Prk. 2, Brgy Motupi, Bukidnon.
Nakumpiska ug narekober atol sa operasyon ang duha ka piso nga gigamit isip antogon, usa ka lamesa sa Cara Y Cruz, usa ka bato nga Cara Y Cruz nga adunay singsing ug lain-laing denominasyon sa kwarta.
Gitanggong na karon ang nadakpang indibidwal sa istasyon sa kapulisan alang sa tukmang pagpasaka og kaso.
