Gihagit sa Malacañang si Vice President Sara Duterte nga motambong sa bicameral conference committee o Bicam meeting aron mapatin-aw ang iyang mga pagduda sa paggamit sa gisugyot nga 2027 national budget.
Una nang gikuwestiyon ni Duterte kung gigamit ba ang budget isip pamaagi sa pagpamugos sa mga senador nga magsilbing mga huwes sa impeachment trial, ug isip ganti sa mga kongresistang mibotar pabor sa impeachment sa House of Representatives.
Sumala sa Palasyo, wala kunoy gipresentar nga ebidensiya ang Bise Presidente aron suportahan ang maong mga alegasyon. Gipasiugda usab niini nga ang Kongreso maoy adunay awtoridad sa pag-apruba ug pag-alokar sa pondo sa gobyerno.
Samtang, nagpahayag og kabalaka si Senate Finance Committee Chairperson JV Ejercito sa pagkunhod sa pondo alang sa panglawas, transportasyon ug uban pang importanteng programa sa bersiyon sa budget nga gipasa sa Kamara.
Mipasalig ang Malacañang nga hugot nga bantayan ang pagpatuman sa 2027 national budget aron masiguro nga magamit ang pondo subay sa gitakdang katuyoan niini.
