DAVAO CITY – Mi-apela ang Provincial Government sa Cotabato sa mga buot modonar sa mga apektadong pamilya nga nabiktima sa linog nga makiglambigit una sa local government units (LGUs) aron nga malikayan ang komosyon kini human ang insidente diin gitagbo sa mga apektadong residente ang mga sakyanan nga nagdala ug relief goods.
Sumala pa kang Cotabato officer-in-charge (OIC) Vice Governor Shirlyn Macasarte-Villanueva nga sa mga buot mohatag ug hinabang mas maayong idiretso una kini sa LGUs aron masiguro nga han-ay ug dili magkagubot ang distribusyon sa relief goods.
Mas maayo sumala pa nga personal kini nga itunol sa Incident Command Center (ICC) nga anaa sa area.
Gipanghimakak sab sa opisyal nga wala nakadawat ug hinabang kadtong mga tawo nga anaa daplin sa kadalanan.
Gani wala sumala pay undang ang Incident Management Team sa paghatag ug food packs ingon man trapal nga himuon ug tents alang sa mga biktima sa kalamidad.
