Gipanghimatuod ni National Bureau of Investigation (NBI) Director Melvin Matibag nga walay nagmando kaniya aron imbestigahan ang giingong human trafficking plot batok kang Executive Secretary Ralph Recto.
Mitubag ang hepe sa NBI human miingon si Batangas Representative Leandro Leviste nga nagsunod lamang si Matibag sa usa ka sugo.
Mibarog si Matibag sa iyang pasalig sa balaod ug mandato sa ahensya, samtang nagkanayon nga wala siyay personal nga relasyon nga makapugong sa kawanihan sa pag-imbestiga sa giingong plano nga pag-frame up batok sa usa ka opisyal sa gabinete.
Ginganlan una sa duha ka testigo sila Representative Leandro Leviste ug dating Congressman Jacinto Paras nga nalambigit sa paghimo sa istorya o pag-frame up kang ES Recto aron iangin sa kaso sa human trafficking.
Hinuon,nagpadayon ang mga imbestigador sa pag-pangolekta og ebidensiya kabahin sa maong alegasyon. Matud ni Matibag, ang ilang kasamtangang basehan mao lamang ang testimonya sa duha ka saksi, pinasikad sa giingong gipahayag kanila ni kanhing Congressman Paras.
Gisulti usab nga giingong si Rep. Leviste ang nagpundo sa maong human trafficking plot aron i-frame up si Recto.
Gipadalhan na og subpoena ang duha ka hingtungdan, ug giawhag sila ni NBI Director Melvin Matibag nga tahuron kini ug ipresentar ang ilang panig sa NBI.
