Gipanghimakak sa Malacañang ang alegasyon nga adunay impluwensiya si Pangulong Ferdinand Marcos Jr. sa imbestigasyon sa National Bureau of Investigation (NBI) kalabot sa giingong hulga ni Vice President Sara Duterte batok sa kinabuhi sa Pangulo.
Nagkanayon si Palace Press Officer Usec. Claire Castro nga dugay nang sakop sa Department of Justice (DOJ) ang NBI ug bahin kini sa ehekutibo, busa dili angay kuwestiyunon ang maong estruktura.
Aduna usab kini kaugalingong mandato sa pagpahigayon og imbestigasyon sa bisan unsang hulga batok sa Pangulo o sa mga hataas nga opisyal sa gobyerno.
Gipasabot usab ni Castro nga seryoso nga gitagad ni Pangulong Ferdinand Marcos Jr. ang pahayag sa Bise Presidente ug dili kini pasagdan.
Dugang pa niya nga importante ang imbestigasyon aron masiguro ang seguridad sa Pangulo, sa First Lady, ug sa kanhing House Speaker, ingon man ang kaayohan sa nasud.
