Susihon na sa Land Transportation Franchising and Regulatory Board (LTFRB) ang tanang pending nga petisyon alang sa dugang pamasahe tungod sa padayon nga pagsaka sa presyo sa mga produktong petrolyo.
Matud ni LTFRB Chairman Vigor Mendoza II, lakip sa ilang tan-awon ang petisyon sa transport group nga Manibela ug ang hangyo sa Piston nga madugangan og ₱10 ang pamasahe.
Gipasabot ni Mendoza nga dili dali ang pagdesisyon sa maong mga petisyon tungod kay kinahanglan usab hunahunaon ang epekto niini sa mga pasahero ug sa presyo sa mga batakang palaliton ug serbisyo.
Samtang wala pa nahuman ang pagrepaso, nagpadayon ang gobyerno sa paghatag og ₱10 nga fuel discount sa matag litro sa gasolina ug diesel alang sa mga kwalipikadong jeepney ug UV Express.
Sa datos sa LTFRB, kapin 87,000 ka public utility vehicles na ang nakapahimulos sa maong programa, samtang labaw sa 140,000 ka mga yunit ang nakapagparehistro.
Gikanayon usab ni Mendoza nga gitinguha sa LTFRB nga makapagawas og pinal nga desisyon sa mga petisyon sa dugang pamasahe sa labing dali nga panahon.
