DAVAO CITY – Padayon nga nakatutok karon ang ahensiya sa Land Transportation Franchising Regulatory Board (LTFRB) 11 sa gipatuman nga social distancing sulod sa Davao City Overland Transport Terminal (DCOTT) kini dungan usab sa gipatuman nga partial lockdown sa dakbayan.
Kahinumduman nga si LTFRB-11 regional director Atty. Armand Dioso mismo ang nangunay sa pagpahigayon ug inspeksiyon diin kalakip sa kamandoan ang pagpasakay lamang ug 25 ka mga pasahero sa matag unit pinasikad sa gipatuman nga protocol aron nga malikayan ang pagkuyanap sa virus.
Hinuon gitino sa ahensiya nga mamahimong itapad sa mga inahan ang ilang dala ng mga bata. Nanganti sab si Atty. Dioso nga mag-atubang ug sanction kadtong padayon nga magmagahi sa maong kamandoan.
Samtang suspendido na sab sugod karong adlawa ang operasyon sa Land Transporation Office (LTO) sugod karong adlawa isip pamaagi aron paglikay sa pagkuyanap sa Covid-19.
Hinuon gitino ni Atty. Gomer Dy, regional director sa LTO, nga kung matungnan kadtong mga buot magpa-renew sa ilang lisensiya karong adlawa, exempted kini sa sanction o penalty nga ilang atubangon sanglit dili pa sab nila mabutyag kung kanus-a nila ipadayon ang ilang operasyon.
