DAVAO CITY – Padayon ang pagpanghatag og rasyon nga food packs sa lokal nga kagamhaan sa dakbayan sa Davao ngadto sa mga apektadong residente sa gipatuman nga enhanced community quarantine gumikan sa Coronavirus disease o Covid-19.
Sa karon, upat na ang food relief programs nga padayong gipang apod-apod sa mga kwalipikadong benepisyaryo sa lungsod.
Sumala kang Davao City Mayor Inday Sara Duterte-Carpio ang upat ka food aid program ang gilangkuban sa food ration nga gidumala sa City Social Welfare and Development Office (CSWDO), Agri-food Program sa pakig-alayon sa City Agriculturist Office (CAO) ug City Veterinarian’s Office (CVO), Hot Meals (Lomi at Lugaw) on Wheels program ug ang pagpanghatag og rasyon sa barangay sa mga residente niini.
Sa karon moabot na sa 292,782 packs ang napanghatag sa CSSDO gikan sa kinatibuk-ang 350,000 packages alang sa mga barangay. Gipaniguro usab ni Mayor Inday Sara nga makadawat ug rice assistance ang tanag 182 barangay nga sakop sa syudad.
