Giwagtang na sa lokal nga panggamhanan ang pagsuspendi sa pagkolekta sa mga basura sa mga nagkadaiyang baranggay dinhi sa dakbayan sa Davao.
Subay sa gipaguwang memorandum, gimanduan ang mga barangay nga tugutan na ang mga residente sa paglabay sa mga basura nga anaa sa ilahang tagsa-tagsa ka mga collection point.
Sa Brgy. 9-A. Poblacion ning syudad, nanganadam na ang nasampit nga baranggay alang sa pagwagtang sa suspensyon sa paglabay og basura.
Sumala ni Kagawad Calumpang, bantayan sa ilahang mga sakop sa baranggay ang mga colection point aron nga walay molapas sa gikatakda nga oras sa ilahang paglabay sa basura.
Kahinumduman nga una ng nagpagawas og kamanduan ang DENR-11 ngadto sa lokal nga panggamhanan sa Davao nga suspendido una ang operasyon sa sanitary landfill gumikan sa nahitabong trashslide kon pagdahili sa mga nagtapun-og nga mga basura nga mikalas og tulo ka mga kinabuhi.
Dugang pa sa maong kamanduan nga kini ang gipakanaog nga mando aron maghatag og dalan sa LGU sa pagplastar sa landfill nga napuno na sa mga basura.
Una na usab nga migawas usab og kamanduan ang LGU ngadto sa mga baranggay nga gidili una ang paglabay sa basura sulod sa lima hangtod sa napulo ka adlaw.
