Patay sa nahugno nga siyam ka andana nga building sa Angeles City, nisaka na sa 22

Mikabat na sa 22 ang gidaghanon sa mga nakabsan sa kinabuhi sa pagkahugno sa usa ka siyam ka andana nga building sa Angeles City, Pampangga.

Gikumpirma sa Bureau of Fire Protection Central Luzon nga adunay usa pa ka lawas nga narekober gikan sa mga guho alas-7:21 sa buntag samtang nagpadayon ang search and retrieval operations.

Sumala sa BFP Central Luzon, ang ika-22 nga biktima nakit-an sa Quadrant 2 sa construction site diin nahitabo ang trahediya.

Una nang gitaho nga mokabat sa 27 ka tawo ang naluwas gikan sa maong insidente.

Bisan pa sa padayon nga pag-ulan nga nakapalisod sa operasyon, wala mohunong ang mga responder sa pagpangita sa posibleng uban pang mga biktima nga mahimong natanggong sa ilawom sa mga guho.