DAVAO CITY – Lisud sumala pa nga masubay ang mga mahitabong Online Sexual Exploitation of Children (OSEC) cases kung wala sumala pa ang kooperasyon sa international authorities.
Sumala sa usa ka wala gihinganlan nga agent nga kabahin sa imbestigasyon sa OSEC cases sa Pilipinas, sagad sumala pa nila nga masubay ang kaso pinaagi sa referral gikan sa international police sanglit ang OSEC usa ka “hidden crime” diin sagad malambigit ang mga suod nga kabanay sa mga biktima hinungdan nga imposible nga makadawat gilayon sila ug mga impormasyon kalabot sa susama nga mga krimen.
Wala sab sumala pa silay madawat nga impormasyon gikan sa komunidad o silingan sa suspek nga nalambigit sa susama nga binuhatan hinungdan nga ang mga international police ang nagasubay niini sanglit malambigit sab niini ang mga langyaw.
Aron nga mabatukan ang susama nga kaso, usa sumala pa sa mga lakang nga angayan nga himuon sa kagamhanan mao ang pagpahigayon ug extensive training sa tanan nga mga sakop sa otoridad.
Una ng gibutyag sa opisyal sa Inter-Agency Council Against Trafficking Davao Region (Iacat-Davao) nga usa ka hagit sa otoridad kung paunsa nila mabatukan ang mga online child sexual exploitation o susama nga klase sa pagpangabuso.
