Naghatag og direktiba si US Pres. Donald Trump sa United States Navy nga pabuthan ug bungkagon ang bisan unsang bangkang Iranian nga makitang nagbutang og mina sa Strait of Hormuz.
Sa iyang post sa social media, gibutyag ni Trump nga wala’y pagduha-duha ang himuong pag-atake sa bisan unsang gamay nga mga bangka nga magbutang og mina sa maong kadagatan.
Matod niya, padayon ang operasyon sa Estados Unidos sa pagtangtang sa mga mina sa Strait of Hormuz pinaagi sa ilahang mga “mine sweepers,” apan iyahang gimando nga triplehon pa ang lebel sa operasyon.
Dugang pa niya, taliwala sa nagkataas nga tensyon sa rehiyon ug global economic pressures, gipadayag nila ni Defense Secretary Pete Hegseth nga nabungkag na ang kadaghanan sa pwersa sa Iran nga gibanabanang adunay kapin 150 ka mga barko.
Bisan paman niini, gitaho nga ang Islamic Revolutionary Guard Corps adunay nahibiling assets sama sa gagmayng bangka nga padayon gihapong gigamit sa ilaahang operasyon.
