DAVAO CITY – Palig-onon pa sa Davao City Police Office (DCPO) ang pagpakatag sa mga kapulisan sa dakbayan aron lamang masiguro ang seguridad sa mga subdivision ug mga simbahan panahon sa paghinumdom sa semana santa.
Sumala pa kang Maj. Ma. Teresita P. Gaspan, DCPO spokesperson nga andam na ang ipatuman nga seguridad sa semana Santa kalakip na ang ipatuman nga maximum deployment sa mga personahe.
Mas daghanan sumala pa ang ipakatag sa mga simbahan ug sa uban pang mga lugar sama sa airports ug bus terminals ilabi na nga daghanan ang plano nga mouli sa ilang tagsa-tagsa ka mga pamilya sa umaabot nga mga adlaw.
Pipila sab sa mga personahe ang magmonitor sa mga subdivisions arun nga malikayan ang mga insidente sa pagpangkungkab ilabi na nga daghanan sab ang wala sa ilang mga panimalay atol sa nahisgutan nga panahon gumikan sa bakasyon.
Nakiglambigit na sab karon ang DCPO sa City Transport and Traffic Management Office ug Task Force Davao alang sa pagpatuman sa security plan nga “multi-layered security blanket” diin langkuban kini sa pagpalig-on sa checkpoints alang sa mga musulod sa siyudad sa panahon sa Semana Santa.
