Sentensiyahan og 25 ka tuig nga pagka priso si kanhing Presidente sa Kosovo Hashim Thaçi human siyang mapamatud-ang sad-an sa mga krimen sa gubat nga nahitabo atol sa 1998 hangtod 1999 nga panagbangi sa Kosovo batok sa Serbia.
Gipagawas ang hatol sa Kosovo Specialist Chambers sa The Hague human sa kapin tulo ka tuig nga paglitis sa kaso batok kang Thaçi ug tulo pa ka kanhing commander sa Kosovo Liberation Army o KLA.
Nakit-an si Thaçi nga responsable sa arbitraryong pagdetine sa 385 ka tawo, cruel treatment sa 49, torture sa 303 ug pagpatay sa 96 ka tawo atol sa panagbangi.
Apan, gibasura sa mga huwes ang unom ka crimes against humanity charges human mapakyas ang prosecution sa pagpamatuod nga adunay widespread o systematic attack batok sa civilian population.
Gilimod ni Thaçi ang mga akusasyon batok kaniya ug adunay posibilidad nga iapela ang desisyon.
Kauban niyang nasentensiyahan sila Kadri Veseli og 18 ka tuig, Rexhep Selimi og 13 ka tuig ug Jakup Krasniqi og 25 ka tuig nga pagka tingkagol sa selda.
Si Thaçi kanhi commander sa KLA ug nahimong prime minister sa Kosovo sa wala pa mahimong presidente. Mihawa siya sa pagkapresidente kaniadtong 2020 aron atubangon ang kaso sa The Hague.
