DAVAO CITY – Ipatawag sa lokal nga kagamhanan ang tanang mga nanag-iya ug resorts ug mga beach sa dakbayan sa Dabaw alang sa pagahimuon nga mga pag-amping batok sa polio virus nga mamahimong makuha gikan sa tubig.
Kini ang adunay kalabutan sa balitang pagkaylap sa polio virus dinhi sa dakbayan sa Dabaw.
Gawas niini, mopahigayon usab ang City Health Office ug lapad nga information ug education campaign sa mga residente nga naa nagpuyo daplin sa kadagatan ug kasapaan.
Labot niini, gikanayon ni CHO Head Dr. Josephine Villafuerte nga gidid-an una sa City Health Office (CHO) ang publiko nga maligo sa kasapaan sa syudad ilabi na sa Davao river gumikan sa posibleng kontaminasyon sa nahisgutang virus sa tubig.
Gawas sa Davao river, gitambagan usab sa CHO ang publiko nga likayan una karon ang pagligo sa mga public swimming pool aron makalikay sa polio virus.
Dugang pa ni Villafuerte nga gawas sa dakbayan sa Dabaw, angayan usab nga mag-amping ang mga residente sa Island Garden City of Samal ug likayan una ang pagkaligo sa dagat.
Subay sumala pa sa pagtuon, gikan 30 hangtud 60 ka adlaw magpabilin sa tubig sa dagat ang polio virus samtang gikan 2 hangtud 6 ka adlaw usab sa tubig nga tab-ang.
