DAVAO CITY – Ginatun-an karon sa Kadayawan Executive Committee sa Davao City ang gikasugyot nga mandatory vaccination batok COVID-19 sa tanang partisipante sa Indak-Indak Street Dance Competition alang sa subling pagbalik sa Kadayawan Festival sa musunod nga bulan.
Gikanayon ni Councilor Al Ryan Alejandre, chairperson sa City Council Committee on Tourism, nagduha-duha sila sa pagpatuman sa maong lakang gumikan basin walay muapil gikan sa ubang rehiyon sa maong kompetisyon.
Gipasabot sa opisyal nga target sa lokal nga kagamhanan nga ibalik ang kalagsik sa turismo sa dakbayan pinaagi sa nasangpit nga selebrasyon ug ang pag-imbita sa mga partisipante ang usa sa mga pamaagi niini.
Sumala pa, adunay pipila nga ilang naimbita nga wala nakaabot sa roll out sa bakuna tungod ang uban niini nanimuyo sa mga lagyong mga barangay.
Busa nagpahigayon ang Execom og benchmarking sama sa pagkonsulta sa ubang organizers sama sa bag-o lang natapos nga T’nalak Festival sa South Cotabato aron mahibaw-an unsa ang gigamit niini nga mga protocols sa ilang Street Dance competition.
Dugang pa sa konsehal, aduna gihapon bahin sa kompetisyon nga kinahanglan niini magsul-ob og facemask tungod lakip kini sa gipatuman nga protocol.
Apan aduna gihapoy showdown area diin pwede nila tanggalon ilang facemask.
Sa kasamtangan, adunay pito gikan sa gawas sa syudad nga mga partisipante ang nagsumite sa ilang aplikasyon alang sa pag-apil sa Indak-Indak sa Kadayawan.
Lakip niini ang Sarangani , Cotabato , Mati City, Davao occidental , Agusan ug Zamboanga.
Via || Hana Rallos
