Gipagula sa buhatan sa Executive Judge sa Regional Trial Court (RTC) XI – Davao City ang usa ka opisyal nga pahimangno nga hugot nga ipatuman pag-usab ang mandatoryong pagsul-ob og face mask sulod sa tanang pasilidad sa Hall of Justice, nga nahimutang sa Ecoland, ning dakbayan.
Ang maong mando gipagula kagahapong adlaw, isip kabahin sa preventive measures nga gipatuman sa korte aron maprotektahan ang kahimsog ug kaluwasan sa publiko nga mosulod sa ilahang opisina matag adlaw.
Sa maong pahimangno, gipatuman nga ang tanang mga opisyal, legal nga mga personalidad, litigants, kliyente, ug bisan pa ang mga bisita nga adunay transaksyon sa sulod sa Hall of Justice kinahanglan gayud sumala pa nga magsul-ob og face mask sa tanang panahon sulod sa maong pasilidad.
Kini nga lakang maoy kabahin sa mas lapad nga inisyatibo sa pagpatuman sa Minimum Public Health Standards nga gisuportahan sa Department of Health ug sa uban pang ahensya sa gobyerno, hilabi na gumikan sa posibleng hulga sa Monkeypox (MPOX).
Nangayo usab og kooperasyon ug pagsabot ang buhatan gikan sa publiko, hilabi na sa mga kliyente ug bisita, alang sa kaluwasan sa tanan.
