Gipahigayon ang JobStart Technical Training and Internship Plan Writeshop alang sa mga partner-employers sa Panabo City, kagahapong adlawa Hunyo 18, 2026 sa AIE Experience Center sa Brgy. San Pedro, Panabo City isip kabahin sa pagpangandam sa mga kompanya sa pagdawat ug pagpalambo sa mga batan-ong aplikante sa trabaho.
Lakip sa maong kalihokan ang paghatag og giya sa mga employer kabahin sa JobStart Program, lakip na ang proseso sa implementasyon niini, mga training component, ug pag-andam sa Technical Training ug Internship Plans. Gipahigayon ang kalihokan pinaagi sa panagtambayayong sa Public Employment Service Office o PESO Panabo. Subay sa programa, gilauman nga mas mapalig-on ang koordinasyon tali sa mga employer ug mga kabatan-onan nga nangandam sa pagsulod sa labor force.
Sumala pa sa mga tigpatuman sa programa, importante ang maong mga lakang aron masiguro nga andam ang mga partisipanteng kompanya sa paghatag og kalidad nga training ug internship opportunities.Dugang pa niini, gitutokan sa maong writeshop ang pagpalambo sa kahibalo sa mga employer aron matubag ang mga panginahanglanon sa kasamtangang labor market ug mapalambo ang kahigayonan sa trabaho alang sa mga kabatan-onan.
Sa kasamtangan, nagpadayon ang mga paningkamot sa Department of Labor and Employment aron mapalig-on ang koneksyon tali sa edukasyon ug panarbaho, subay sa tumong ni Labor Secretary Francis N. Tolentino nga mas maandam ang mga batan-ong Pilipino pinaagi sa husto nga kahanas, kasinatian sa trabahoan, ug mas daghang oportunidad sa trabaho.
