DAVAO CITY- Tingkagol karon sa prisohan ang usa ka lalaki nga gikonsiderang anaa sa ika-walo sa drug watchlist sa Davao Region human kini nadakpan atol sa gipahigayong drug buy-bust operation sa mga sakop sa Digos City Police Station sa Corner Corregidor St., Lim St., Brgy. Zone 3, Syudad sa Digos kagahapon, Oktobre 11.
Nailhan ang suspek nga si Jojo Dumaguete, alyas ‘Bots’ 24 anyos ug residente sa purok Jaguar, Lapu-Lapu Ext., Brgy Zone 3, Digos City. Positibong napalitan sa pulis nga nagtakubang buyer ang suspek hinungdan nga dali kining nasikop.
Nakuha sab gikan sa iyang posisyon ang pipila ka pakete sa gituohang shabu nga gibana-banang mutimbang og 0.44 gramos ug nagkantidad og P6,600. Gihikay na ang kasong paglapas sa RA 9165 nga ipasang-at sa dinakpan. Kasamtangan karon nga anaa sa kustodiya sa kapulisan ang nasangpit nga suspek.
VIA|| Bryan Chin Abe
