DAVAO CITY – Nahimong mabungahon, mabulukon ug masadyaon ang katapusang adlaw sa pagsaulog sa ika-37 nga Kadayawan Festival sa Davao City.
Sa tibuok semana nga selebrasyon, mipatigbabaw ang panaghiusa sa mga tribo sa dakbayan sa pagpasalamat sa grasya sa kinaiyahan ug kahiusahan sa matag lumad, kristyano ug moro.
Sa ulahing adlaw, nagpakita sa kaabunda sa ani ang mga giparadang floral floats atol sa Pamulak Kadayawan.
Nakadaog sa unang pwesto ang floral float sa AEON Towers sa Dako category, samtang 1st placer sab sa Gamay category ang floral float sa Del Mar Painitan; ug Tahawrog Tribe sa Marilog District ning dakbayan isip grand winner sa Lahi category.
Nagpakita sab ug abilidad sa pagtugtog ang mga misalmot sa Pitik sa Kadayawan diin upat ka higayon nang nahimong grand champion ang grupong Mugnapak the Beaters sa Magallanes Elementary School.
Kagabii sab nagsadya ang tanang Dabawenyo sa Bantawan Ampitheater sa Magsaysay Park ning dakbayan tungod sa Tambayayong sa Kadayawan isip culminating event sa kasaulogan.
Napuno sa musika sa pagpasalamat ang maong event tungod sab sa mga performing groups ug Davao homegrown artists nga sila Popong Landero ug Maan Chua.
Sa katapusan, gipasalamatan sa City Government of Davao ug mga festival organizers ang tanang mga Dabawenyo nga nakighiusa sa pagbaton og malinawon nga kasaulogan.
via || Bombo LJ Florendo
