DAVAO CITY- Gibutyag ni Davao City Fire District Spokesperson Sr. Insp. Frances Marie Sendrijas nga misaka ang ihap sa insidente sa sunog sa syudad sa davao karong tuiga alang sa unang unom ka bulan sa tuig 2024.
Sumala pa sa maong opisyal nga hangtod Hunyo 18, 2024 anaa na sa 481 ka mga insidente sa sunog ang natala sa moang buhatan diin kon itandi mas taas kini sa 381 nga natalang kaso susamang panahon sa milabayng tuig 2023.
Pagbutyag pa niini nga sa maong ihap 139 niini ka insidente ang residential, samtang 43 niini ang non-residential.
Pinakadaghang natala sa kaso sa sunog mao ang sa non-structural nga mikabat sa 277 ka kaso, samtang sa transport ang anaa sa 21 ka insidente.
Sa kinatibuk-an mibalor ang damyos sa maong mga insidente sa sunog ngadto sa P 59, 996,100.
Karong panahona nga natapos na ang ting-init ug opisyal nang nagsugod ang ting-ulan, gipasalig usab sa Davao City Fire District nga andam sila nga mutabang panahon sa kalamidad.
Dugang pa niini nga andam gayud sa tanang panahon ang ilahang mga firetrucks, firetruck ladder, rescue truck ug mga fireboats nga magamit sa panahon sa kalamidad.
via/ DMA
