Gipahibalo sa White House nga “terminated” o nahuman na ang giyera sa Iran human makab-ot ang gitakdang deadline sa pagtapos sa gubat adlaw nga Biyernes (oras sa Amerika).
Matod sa usa ka senior official sa administrasyon ni US Pres. Donald Trump, alang sa War Powers Resolution, ang mga panagbangi nga nagsugod niadtong Sabado, Pebrero 28, opisyal nang natapos.
Nasayran nga ubos sa U.S. War Powers Resolution of 1973, giisip nga tapos na ang 60 ka adlaw nga lugway nga gihatag sa Kongreso aron tugotan ang Presidente sa Amerika sa pagpahigayon og military operations nga walay pagtugot gikan niini, gawas kung palugwayan o aprobahan sa lehislatura.
Kinumduman nga nagsugod ang pag-atake sa U.S. ug Israel batok sa Iran niadtong Pebrero 28, 2026, duha ka bulan na ang milabay.
Bisan pa niini, alang sa mga Democrats sama ni Sen.Jeanne Shaheen, walay klarong basehan sa balaod aron ideklarar nga nahuman na ang “hostilities” kung padayon gihapon ang presensya sa pwersa militar sa rehiyon.
Dugang pa niya, wala pa gyud nahuman ang tensyon tungod kay hangtod karon adunay mga barko sa U.S. nga nagbantay ug nagharang sa oil exports sa Iran.
Sumala pa sa miyembro sa Senate Foreign Relations Committee, milapas na sa 60 ka adlaw ang giyera sa Middle East ug kinahanglan adunay klarong plano si Trump kung paunsa kini pagatapuson.
Bisan sa kontrobersiya, halos tanang miyembro sa Republican bloc sa Kongreso nagpadayon sa pagsuporta sa administrasyon ni Trump ug misupak sa mga sugyot nga pahunongon ang operasyon sa rehiyon.
