Andam na karon sa pag-alagad sa mga atletang Pilipino ang dugay nang gihulat nga Olympic-sized swimming pool sa University of the Philippines Mindanao dinhi sa dakbayan sa Davao.
Nakaangkon og dakong kausaban gikan sa warm-up pool hangtod sa competition pool nga kini ang naangkon kabahin sa kalamboan sa Regional Training Center.
Ang Aquatic Center nakahuman na sa unang hugna sa proyekto sukad pa niadtong 2018 pinaagi sa lig-on nga panagtambayayong sa Philippine Sports Commission (PSC), University of the Philippines (UP), ug Department of Public Works and Highways (DPWH), uban sa suporta ni Sen. Go isip chairperson sa Sports sa Senado nga nagresulta sa usa ka dekalidad nga pasilidad alang sa training sa mga atletang swimmer.
Tungod sa padayon nga koordinasyon ug dedikasyon sa mga faculty ug staff sa UP Mindanao sa pagpahimulos ug pagpahimong mas matahum ang sentro maoy nakatabang sa malampusong pagpaayo sa maong pasilidad.
