DAVAO CITY – Niusbaw karong semanaha ang presyo sa mga prutas ilabi na ang mga ginatawag nga “Iconic Fruits of the City” sama sa marang,rambutan, lanzones, mangosteen ug pomelo.
Apan anaay mga prutas nga parehas lamang ang presyo sa milabay nga semana sama sa mangga ug pinya nga mahimong mapalit sa presyong PHP130.00 per kilo.
Ang watermelon nga kaniadto nga mapalit lamang sa PHP25.00 kada kilo, nahimo na sa karon og PHP35.00.
Samtang ang ginatawag nga “King of Fruits” misaka sab ang presyo gikan sa PHP70.00 nga anaa na karon sa PHP100.00 matag kilo ang mapalit nga magdepende sa variety.
Ang puyat nga variety anaa sa PHP120.00 per kilo samtang makapalit og tag PHP100.00 kada kilo sa laing variety sa durian sama sa COOB,CHANIEE,MUNTONG,RANCILLO og NATIVE.
Samtang sa pikas bahin, misaka og 20 pesos ang presyo sa Pomelo gikan 80 pesos. Kung kaniadto makapalit kita og mangosteen sa presyong 20 hangtod 50 kada kilo, karon miabot na kini sa 200 pesos kada kilo nga labawng gikagul-an sa mga tigpamaligya mahitungod dili na mahalin ang ilang mga baligya tungod sa kamahal niini.
Usa sa mga rason sa pagsaka sa presyo sa maong mga prutas mao ang dili na panahon sa tingbunga mao nga ang mga tigpamaligya, nagailoganay na sa supply sa maong mga prutas ug dili tungod umabutay na ang pagselebrar sa Kadayawan Festival.
Via || DANICA BAGUIO
