Mipasundayag og paghagit si Salvador Medialdea sa Registry sa International Criminal Court (ICC) atol sa gihimong pagdungog sa Pre-Trial Chamber aron ipasabot kung giunsa ang pagbalhin ni kanhi Presidente Rodrigo Duterte gikan sa Pilipinas ngadto sa kustodiya sa ICC nga giisip niini nga usa ka “labaw pa sa pag-abuso sa proseso.”
Samtang mitubag usab si Presiding Judge Iulia Motoc kabahin sa giluwatang pahayag ni Mediladea nga si kanhing Pang.Duterte gipahibalo na sa iyang mga katungod ug sa mga sumbong batok kaniya, sumala pa sa report sa Registry. Gidugang usab niini nga ang mga kabalaka kabahin sa iyang pagbalhin ug pag-aresto mahimong hisgutanan sa sunod nga mga proseso.
Sumala sa website sa ICC, ang pre-trial stage naglakip sa inisyal nga pagpakita ug sa confirmation of charges hearings, diin ang mga huwes magdesisyon kung aduna ba’y igong ebidensiya aron ipadayon ang kaso ngadto sa pagtaral.
Ang usa ka suspetsado makapahamtang og hagit batok sa ebidensiya sa piskal atol sa confirmation of charges hearings. Human niini, ang korte magdesisyon kung ipadayon ba ang husay, usa ka proseso nga mahimong molungtad pa og pipila ka bulan o bisan pa sa mga dugang katuigan.
Kahinumduman nga niadtong Byernes sa gabii oras sa Pilipinas mitambong si Pang. Duterte pinaagi sa video link sa ICC, diin siya nag-atubang og mga alegasyon sa pagpamatay nga adunay kalambigitan sa iyang maduguon nga “giyera batok sa droga.”
Gibasahan si Duterte sa korte sa mga sumbong batok kaniya nga adunay kalambigitan sa mga pagpamatay ilawom sa iyang administrasyon. Sumala pa sa ICC nga sunod nga pagdungog alang sa pagkompirma sa mga sumbong gikatakda sa Septyembre 23, 2025.
