Giawhag sa Office of Public Counsel for Victims (OPCV) ang International Criminal Court (ICC) nga itakda gilayon, walay paglangan, ang confirmation of charges hearing batok kang kanhing Pangulong Rodrigo Duterte.
Kini misunod sa unanimous nga desisyon sa medical experts panel nga “fit to stand trial” ang kanhing Pangulo.
Sa usa ka confidential filing ngadto sa Pre-Trial Chamber I, gibutyag ni OPCV Principal Counsel Paolina Massidda nga ang joint ug individual reports sa mga medical expert klarong nagpakita nga walay medikal nga kondisyon ang kanhing Pangulo nga makapugong kaniya sa pag-atubang sa pre-trial proceedings.
Gibutyag usab ni Massidda nga ang mga biktima adunay katungod sa usa ka madali ug saktong proseso, ilabina nga napamatud-an na sa mga eksperto nga andam ug takos ang kanhing Pangulo nga moatubang sa pagkaso batok kaniya.
Sa laing bahin, gipangatarungan sa kampo sa depensa nga bisan pa makatambong sa pagdungog ang kanhing Pangulo sa mga ebidensiya sa korte, dali lamang niya kini makalimtan ug lisod niini ikumpara sa ubang ebidensiya.
Matod sa depensa, madaut ang hustisya kon ang usa ka suspek dili na makadepensa sa kaugalingon o dili na makahatag og klarong instruksyon sa iyang mga abogado.
Gitumong usab sa depensa ang giingong internal contradictions sa mga medical expert, lakip ang isyu sa kahuyang sa kanhing Pangulo, pagkawala sa pangdungog, dili maesplikar nga pagkunhod sa timbang, ug ang paghulagway kaniya ingon nga usa ka “unreliable historian” sa iyang kaugalingong kahimsog ug mga sintomas.
Tungod niini, gihangyo sa depensa ang Pre-Trial Chamber nga magpatawag og usa ka evidentiary hearing aron klarohon ang konklusyon sa mga medical expert, ilang mga metodolohiya, ug uban pang may kalabutan nga isyu usa ka pamaagi nga giingon niining kasagaran ug standard practice sa daghang hurisdiksyon ug sa internasyonal nga mga tribunal.
