Mipasaka si Palawan 2nd District Representative Jose Chaves Alvarez, nga mao usab ang Chairperson sa House Committee on Energy, og House Resolution No. 1249 aron pormal nga imbestigahan, in aid of legislation, ang system loss charges nga giapil sa bayronon sa kuryente.
Tumong sa maong resolusyon nga susihon kung patas, tin-aw, ug adunay igo nga panalipod alang sa mga konsumidor batok sa maong bayranan.
Sa maong imbestigasyon, susihon kung giunsa pagkuwenta ang system loss, masiguro ang transparency, ug tan-awon kung napanalipdan ba ang interes sa publiko.
Gitinguha sa komite nga hisgotan ang maong isyu sa dili pa usbon o tangtangon ang system loss charges ubos sa mga pending nga mga gisugyot nga balaod sa Kamara.
Aron madungog ang tanang sektor ug mapatin-aw ang isyu ngadto sa publiko, plano sa Kamara nga ipatawag ang Energy Regulatory Commission (ERC), ang ahensya nga nagtakda ug nag-regulate sa mga bayronon sa enerhiya, ingon man ang Transmission Provider ug Distribution Utilities, lakip ang mga korporasyon ug kooperatiba sa kuryente nga nag-apod-apod sa suplay sa elektrisidad ngadto sa mga panimalay.
Apil usab ang mga grupo nga nagrepresentar sa ordinaryong mga konsumidor aron mapaminaw ang ilang mga kabalaka ug reklamo.
Sumala sa pahayag sa House of Representatives Press and Public Affairs Bureau, adunay duha ka nag-unang hinungdan nganong angay karon nga himuon ang maong lakang.
Daghang konsumidor ang nalibog kung unsa gyud ang system loss charge, ug mas gipasamot pa kini sa nagkadaiyang impormasyon nga nagkatag sa social media.
Ang maong imbestigasyon nagsunod usab sa direktiba ni Pangulong Ferdinand Marcos Jr. atol sa iyang ikalimang State of the Nation Address (SONA) nga tun-an ang posibilidad sa hingpit nga pagtangtang sa system loss charges aron moubos ang binuwan nga bayranan sa kuryente sa mga Pilipino.
