Gipahibalo sa Davao City Water District (DCWD) ang publiko nga adunay temporaryong pagka-undang sa suplay sa tubig karong adlawa sukad kaganihang alas 9:00 sa buntag hangtod alas 6:00 ugma sa buntag, nga makaapekto sa pipila ka lugar nga ginaserbisyohan sa Lubogan Water Supply System (WSS).
Ang mga partikular nga lugar nga walay tubig mao ang: Tibuok Bangkas Heights, apil ang Green Prairie, Purok 6,Purok 7A, Batulosa, Kristina Homes 1, lugar nga naglibot sa Bangkas Heights Road, ug Toril-Calinan Road (gikan sa eskina sa Libby Road paingon sa eskina sa Bangkas Heights Road).
Sumala pa sa pamunuan sa DCWD nga gikinahanglan nga i-shutdown ang suplay sa tubig sa maong mga dapit aron hatagan og luna ang pag-tap sa bag-ong pipeline nga gi-install paingon sa pipeline sa DCWD sa Bangkas Heights Road ug Lubogan-Mulig Road, isip kabahin sa mainline improvement sa Green Prairie.
Kung makompleto na ang maong trabaho, gilauman nga molambo ang suplay sa tubig sa mga apektadong lugar. Nangayo ang pamunuan sa DCWD og pagsabot ug kooperasyon gikan sa mga kustomer nga posibleng maapektuhan.
Gihangyo usab ang tanan nga mag-andam og igo nga tubig sa wala pa ang gikatakdang petsa sa pagka-undang sa serbisyo.
Posibleng mahimong sayo ang pagbalik sa suplay sa tubig kung hapsay ang trabaho sa DLPC, apan posibleng malangay usab kini kung adunay dili matag-an nga mga problema. Pagkahuman sa maong serbisyo, maghimo ang DCWD og flushing.
Sa pagbalik sa tubig, gihangyo ang mga kunsumante nga ablihan ang tanan niining gripo sulod sa duha (2) ka minuto aron ipalusot ang posibleng hugaw nga tubig.
Tambag usab sa water district nga dili gilayon ang pag-inom sa tubig gikan sa gripo. Mas maayo nga pabukalan ang tubig isip dugang nga pag-amping.
