Gipatuman sa Malacañang ang work-from-home arrangement alang sa mga empleyado sa gobyerno sa Zambales, Bataan ug Occidental Mindoro karong Martes, Agosto 11, tungod sa dili maayong panahon nga dala sa Habagat.
Gibase ang maong lakang sa Memorandum Circular No. 124 nga gipirmahan sa Office of the President human kini marekomendar sa National Disaster Risk Reduction and Management Council o NDRRMC.
Ubos sa maong mando, dili na kinahanglan nga moadto sa ilang mga opisina ang mga empleyado sa gobyerno sa tulo ka lalawigan ug magpadayon na lamang sa ilang trabaho gikan sa ilang mga panimalay.
Gipatuman usab ang alternative learning modes sa tanang lebel sa mga eskwelahan sa maong mga probinsya, gawas kon adunay laing mando nga ipagawas ang lokal nga mga pangulo.
Apan dili sakop sa work-from-home arrangement ang mga ahensya nga naghatag og basic ug health services, disaster response ug uban pang importanteng serbisyo.
Gimandoan ang maong mga ahensya nga magpabiling operational aron mapadayon ang paghatag sa gikinahanglang serbisyo sa publiko samtang nagpadayon ang dili maayong panahon. | VIA BOMBO EROS PAJOTA
