DAVAO CITY – Sugdan gilayon sa gimugnang investigation Task Group ang pagpanubay sa pagpatay sa Barangay Captain nga si Ronnie Valera sa Matiao Mati City, Davao Oriental.
Kahinumduman nga gipusil ang biktima sulod mismo sa iyang panimalay sa wala pa gihapon mailhi nga mga suspetsado.
Sumala pa kang Davao Oriental Governor Nelson Dayanghirang, gimandoan na niya ang mga opisyal sa Philippine National Police (PNP), Criminal Investigation ug Detection Group (CIDG), ingon man National Bureau of Investigation (NBI) sa pagmugna sa nahisgutan nga grupo.
Tumong niini nga masulbad gilayon sa Task Force ang kaso sa hinanali nga panahon.
Gitataw sab sa opisyal nga ang nahisgutan nga insidente mamahimo sumala pa nga election-related apan subayon sa otoridad ang laing posible pa nga motibo sa pagpamusil kang Valera.
Gitino ni Dayanghirang nga sukad kaniadto wala sumala pay bisan unsa man nga election-related violence ang lugar gawas na lamang sa mga natala karon nga duruha ka kaso nga nahitabo ning panahon sa eleksiyon.
Nanawagan kini sa mga makahatag ug impormasyon aron nga mapadali ang imbestigasyon kini pinaagi sa pakiglambigit sa otoridad.
Kahinumduman nga ang kamatayon ni Valera mao ang ikaduha nga kaso sa pagpatay sa lugar sulod lamang karung bulana.
Gipasalig sa lalawigan nga luyo sa mga panghitabo, siguruhon nila nga mapahigayon ug malinawon ang national and local elections sa Mayo 9, 2022.
