Nagkalahi ang baruganan sa upat ka retiradong Supreme Court justices kabahin sa gidaghanon sa boto nga gikinahanglan aron ma-convict sa impeachment trial si Vice President Sara Duterte.
Sila kanhing Chief Justices Hilario Davide Jr., Artemio Panganiban ug Reynato Puno miingon nga dili awtomatikong permanente ang 16 ka boto, samtang lahi ang baruganan ni retired Associate Justice Adolfo Azcuna nga ang tanang 24 ka senador angay magpabiling basehan sa pagkwenta.
Ang isyu mitumaw human gihagit ni Senator-Judge Erwin Tulfo ang naunang ruling ni Senate President ug Presiding Officer Francis “Chiz” Escudero nga 16 ka boto, o two-thirds sa 24 ka miyembro sa Senado, ang gikinahanglan alang sa conviction.
Matud ni Davide, angay lamang iapil sa denominator ang mga senador nga legal ug pisikal nga kwalipikadong mobotar. Si Panganiban nagkanayong dili lamang abstract mathematics ang mahimong basehan sa constitutional interpretation.
Samtang, si Puno mipabor sa contextual ug functional nga paghubad sa probisyon ug miingon nga mahimong mausab ang ihap depende sa mga sirkumstansya sa mga senador nga mahimong dili makapartisipar sa proceedings.
Apan si Azcuna mipadayon sa iyang baruganan nga ang pulong nga “all the Members of the Senate” nagpasabot sa tibuok 24 ka miyembro, busa dili angay mausab ang denominator base sa attendance o kapasidad sa pag-apil sa trial.
Gilauman nga ipresentar sa prosecution ug defense ang ilang tagsa-tagsa ka argumento sa Septiyembre 23, samtang nagpabiling epektibo ang naunang 16-vote ruling hangtod wala pa kini mausab sa impeachment court.
