Kasamtangang nabilanggo na sa detention facility sa House of Representatives si kanhi Philippine Charity Sweepstakes (PCSO) General Manager Royina Garma, homan kini gipahamtangan ug contempt sa House Quad Committee gumikan sa pagpamakak ug dili pagtubag sa pangutana sa mga magbabalaod.
Kung kahinumduman sa gihimong pagdungog sa komite, nakahilak si Garma ug gipamugos nga wala kini namakak.
Mihilak nga naghangyo kini sa komite nga buhian siya gumikan kay naghulat sa iyaha ang nagsakit niining anak ug pangitaon siya niini.
Samtang tubag usab ni Sta Rosa, Laguna Rep. Dan Fernandez, nasabtan nila ang gibati sa kanhi opisyal sa PCSO ug gikanayon sa magbabalaod nga ipasundo ang anak ni Garma ug dalhon sa kamara.
Samtang sa kabahin usab ni Abang Lingkod Party List Rep. Stephen Caraps Paduano, adunay pruweba kini nga namakak si retired colonel Royina Garma.
Nasentro usab ang hisgutanan sa byahe ni Garma nga moadto unta kini sa Amerika aron patambalan ang nagsakit nga anak.
Matod pa niini, dili direct flight ang iyang nakuha hinungdan nga nag-stop over sila sa Japan ug sa dihang mikuha na kini ug boarding pass, gisulti kaniya nga gikanselar na ang iyahang US Visa hinungdan nga dili kini pwedeng mubyahe.
Gikanayon usab ni Garma nga wala siya masayod kung nganong gikanselar ang iyahang US Visa.
Apan bisan paman niini, gipahayag ni Rep. Paduano nga dili isyu ang iyahang pagbyahe kung nganong cited in contempt si Garma ug kini mao nga sa pagsugod sa pagdungog pa lamang, namakak na ang nahisgutan.
