Gikondena sa United States ang giingong “destabilizing” nga kalihokan sa China duol sa disputed Scarborough Shoal sa WPS, nga giingon sa US nga gigamit ang kwestiyonableng environmental explanations aron mapalapad ang territorial claims niini.
Sumala ni State Department spokesman Tommy Pigott nga misupak ang Estados Unidos sa padayong paningkamot sa China nga ipatuman ang gitawag nitong “national nature reserve” sa Scarborough Reef ug pugngan ang mga Pilipinong mananagat sa pag-access sa ilang tradisyonal nga pangisdaan.
Gipasanginlan usab ni Pigott ang China sa paggamit sa environmental ug legal nga mga rason, nga gisuportahan sa pagpamugos, aron mapalapad ang pag-angkon sa teritoryo sa South China Sea ingun man sa West Philippine Sea nga makadaot sa mga silingang nasud.
Kahinumdoman nga naghimo ang China og bag-ong mga lagda alang sa pagdumala sa nature reserve nga unilateral nga gitukod kaniadtong miaging tuig palibot sa shoal, nga kontrolado karon sa Beijing.
Nahimutang ang Scarborough Shoal, nga gitawag og Bajo de Masinloc sa Pilipinas, mga 240 kilometros gikan sa Luzon ug nailhan isip usa ka coral formation nga abunda sa isda. Parehong nag-angkon sa maong lugar ang Beijing ug Manila.
Nag-angkon ang China sa kadaghanan sa South China Sea, lakip ang Scarborough Shoal, bisan pa sa internasyonal nga ruling nga nag-ingon nga walay legal nga basehan ang maong claim.
Nagpadayon ang panagbangi tali sa China ug Pilipinas bahin sa mga teritoryong gilalisan, diin ang labing bag-ong mga insidente nahitabo kaniadtong miaging bulan.
