Naghangyo si Senate impeachment court Presiding Officer Francis “Chiz” Escudero sa prosecution ug defense panels sa impeachment trial ni Vice President Sara Duterte nga mag appoint og laing spokesperson nga dili kabahin sa ilang legal counsel.
Matud ni Escudero, sa pagkakaron ang mga spokesperson sa duha ka kampo, sila Atty. Benjamin Tolosa sa prosecution ug Atty. Michael Poa sa depensa, mao usab ang ilang mga abogado sa impeachment trial.
Bisan wala pa siyay namatikdang paglapas sa ilang mga gipahayag sa media, gikanayon ni Escudero nga mas angay nga adunay laing tigpamaba aron malikayan ang posibleng isyu samtang nagpadayon ang pagtaral.
Gipasabot usab niya nga padayon nga bantayan sa impeachment court ang mga pahayag sa publiko sa mga abogado sa duha ka kampo aron masiguro nga wala kini makalapas sa mga lagda sa korte.
Samtang, matud ni impeachment court spokesperson Atty. Reginald Tongol, anaa sa prosecution ug depensa ang desisyon kung mopili ba sila og bag-ong spokesperson.
Dugang ni Tongol wala pa sila nakakita nga adunay milapas sa sub judice rule sa mga pahayag nila Atty. Michael Poa ug Atty. Benjamin Tolosa.
