Human sa duha ka sunod-sunod nga semana sa dagkong pagsaka sa presyo sa petrolyo, diin miabot sa napulo hangtod baynte pesos kada litro ang dugang sa presyo sa diesel ug gasolina, mipanawagan pag-usab si Senador Bong Go sa ehekutibo alang sa dali nga aksyon ug tabang sa mga Pilipino nga grabeng naapektuhan.
Sa iyang pahayag, giingon sa senador nga gibati gihapon sa mga mamamayan ang kalisod nga dala sa taas nga presyo sa petrolyo, uban sa pagsaka sa presyo sa mga palaliton, bayranan sa kuryente, ug ubos nga bili sa piso batok sa dolyar.
Dugang pa niya, nakig-uban siya sa pag-ampo nga mobalik na sa normal ang panginabuhi sa matag Pilipino.
Nagsugod na karong semanaha ang ikaduhang regular session sa Kongreso diin uban sa iyang mga kaubang magbabalaod, tutukan ni Go ang mga programa ug mga panukalang balaod nga nagtumong sa paghatag og kahupayan sa katawhan.
Gipasiugda sa senador nga panahon sa krisis, importante nga masiguro nga adunay igo nga suporta ug proteksyon ang mga Pilipino batok sa padayon nga pagsaka sa presyo sa mga pangunang panginahanglanon.
