Gimonitor sa Department of Social Welfare and Development (DSWD) ang kahimtang sa mga komunidad nga naapektuhan sa bagyong Kiyapo, ilabi na sa Northern Luzon.
Una nang gipataas sa DSWD-Disaster Response Command Center (DRCC) ang blue alert status human misulod ang bagyong Kiyapo sa Pilipinas.
Nagpasabot kini nga 24 oras nga ginabantayan sa ahensya ang kahimtang sa mga lugar nga gilaumang maapektuhan sa bagyo, lakip ang koordinasyon uban sa national agencies, local government units, ug mga field office.
Ubos sa maong alerto, gisiguro sa DSWD ang paspas ug hapsay nga pagtubag sa mga lugar nga apektado sa grabeng kahimtang sa panahon.
Gipahimutang usab sa heightened alert ang tanang DSWD Field Offices alang sa dali nga pagpalihok sa Quick Response Teams (QRTs), samtang gi-activate na usab ang Camp Coordination and Camp Management (CCCM) operations.
Sa wala pa misulod ang bagyo, giandam na sa DSWD ang Food and Non-Food Items (FNFIs) nga una nang gipahimutang sa mga estratehikong lugar.
Gipasiguro usab sa ahensya ngadto sa mga regional office niini ang hugot nga pagpatuman sa mga lakang alang sa proteksyon sa mga Internally Displaced Persons (IDPs), ilabi na kung gikinahanglan ang pagbakwit.
