DAVAO CITY – Usa ka drug den nga gipanag-iyahan sa usa ka babaye ang gibungkag sa usa ka buy-bust operation nga gipahigayon sa may Purok 2, Barangay Mainit, Nabunturan, Davao de Oro, niadtong Sabado sa gabii.
Atol sa operasyon nga gipangunahan sa mga sakop sa PDEA XI, Regional Special Operation Group sa Police Regional Office XI ug Nabunturan Municipal Police, nadakpan ang tag-iya sa maong drug den nga si Mhellie Jhim Julva, 42 anyos.
Wala sab makaikyas sa otoridad ang napulo pa niyang mga kauban sulod sa drug den.
Positibong napalitan ang suspek ug usa ka pakete sa uno gramo nga gituohang shabu nga nagkantidad ug P12,000.
Samtang nasignit sab gikan sa sulod sa drug den sa suspek ang lain pang upat ka pakete sa gituohang shabu nga trese gramos ang kinatibuk-ang gibughaton ug mubalor sa kapin P195,000 ang kantidad.
Mag-atubang ang mga dinakpan ug kasong pagsupak sa Republic Act 9165 kon Comprehensive Dangerous Drugs Act of 2002 samtang sa selda sa Nabunturan Municipal Police Station ang ilang nahimong kapaingnan.
via || Bombo LJ Florendo
