Gilimod sa Malacañang ang mga alegasyon sa destabilisasyon ug gipasalig niini nga tapuson ni Pangulong Ferdinand R. Marcos Jr. ang iyang termino taliwala sa mga giingong “assassination plot” batok kaniya.
Kini ang pahayag ni Palace Press Officer Undersecretary Claire Castro human migawas sa House impeachment hearing ang testimonya ni Ramil Madriaga.
Sumala ni Madriaga, aduna sumala pa’y mga panag-istorya tali sa kampo ni kanhing Pangulong Rodrigo Duterte ug pipila ka retiradong heneral alang sa plano nga pugsanong pagtanggal sa pwesto sa Presidente sa tuig 2025.
Gipaklaro ni Castro nga walay personal nga kahibalo ang Pangulo o ang Malacañang sa mga giingong pag-istorya ni Madriaga ug sa kanhing Pangulo.
Gibutyag niini nga ang Pangulo nangampanya sa katawhan, misaad sa serbisyo publiko, ug nagpasalig nga tapuson niya ang iyang termino alang sa nasud.
Gipasalig usab sa opisyal nga bisan naka-focus ang Pangulo sa iyang trabaho, dili pasagdan sa gobyerno ang maong seryosong mga hulga.
Sayron sa gobyerno ang tinuod sa likod sa mga alegasyon aron mapadayon ang seguridad sa Presidente ug ang kalig-on sa nasud.
