Nasangit ang usa ka drone sa linya sa kuryente sa Purok 5, Maparat, Compostela, Davao de Oro, nga miresulta sa temporaryong brownout sa maong lugar.
Tungod sa insidente, gipahinumdoman sa Northern Davao Electric Cooperative Inc. kon NORDECO ang publiko nga mag-amping sa pagpalupad og drone, tabanog ug ubang butang duol sa mga linya ug pasilidad sa kuryente.
Matod sa electric cooperative, mahimong peligro ang bisan unsang butang nga masangit kon makatandog sa power lines tungod kay mahimo kining hinungdan sa power interruption ug hulga sa kaluwasan sa publiko.
Dugang pa, gipunting sa NORDECO ang Republic Act No. 11361 kon Anti-Obstruction of Power Lines Act, nga naglatid sa paglikay sa mga obstruction nga mahimong makaapekto sa transmission ug distribution lines.
Lakip sa ilang pahimangno ang pagpili og luwas ug halayong lugar kon magpalupad og drone kon tabanog.
Sa pagkakaron, gidasig ang publiko nga likayan ang mga kalihokan duol sa linya sa kuryente aron malikayan ang susamang insidente ug mapadayon ang luwas ug maayong suplay sa elektrisidad.| VIA BOMBO EROS PAJOTA
