Gipakusgan sa Department of Energy ang pagpangita og mga lugar nga magamit aron suportahan ang rollout sa offshore wind energy projects sa Pilipinas.
Mipirma ang DOE ug Philippine National Oil Company o PNOC og memorandum of agreement nga gipangunahan nila Energy Secretary Sharon Garin ug PNOC President and CEO Franz Josef George Alvarez.
Ubos sa kasabutan, ang PNOC mahimong designated agency sa DOE aron paspason ang pagproseso sa land leases ug permits gikan sa Department of Environment and Natural Resources.
Tumong sa gobyerno nga mapataas ngadto sa 35% ang bahin sa renewable energy sa power generation pagsapit sa 2030, gikan sa kasamtangang 25%.
Gilauman usab nga magsugod ang pipila ka offshore wind developments sa 2028.
Bisan na-delay ang unang auction tungod sa logistical issues, infrastructure readiness ug supply chain risks, target gihapon sa DOE nga ipadayon kini karong December.
Apil sa bidding ang 3,300 megawatts nga fixed-bottom offshore wind capacity nga gilaumang ma-deliver gikan 2028 hangtod 2030.
Matod sa Global Wind Energy Council, kinahanglan usab og labing menos 500 million dollars aron ma-upgrade ang mga pantalan nga mosuporta sa offshore wind projects.
