Gimandoan ni Defense Secretary Gilberto Teodoro Jr. ang Armed Forces of the Philippines (AFP) nga magpahigayon og tukmang proseso may kalabotan sa reservist status ni Senator Robin Padilla human kini miangkon sa Senado nga usa siya ka komunista. Sumala pa kang Teodoro, kinahanglan susihon sa AFP ang maong pahayag ni Padilla aron matino kung adunay epekto kini sa iyang kahimtang isip reservist sa Philippine Army.
Kahinumduman nga sumala sa rekord sa Philippine Army, nahimong reservist si Padilla niadtong 2019 ug gihatagan og ranggong Captain isip kabahin sa programa nga nagpasidungog sa mga personalidad nga mahimong ehemplo sa kabatan-onan. Dugang pa niini, migawas ang mga panawagan nga tangtangon si Padilla isip reservist human niya ipahayag sa impeachment trial ni Vice President Sara Duterte nga siya usa ka komunista.
Matud pa sa mga opisyal, ubos sa mga lagda sa AFP Reservist Program, mahimong matangtang ang usa ka reservist kung mapamatud-ang nakalapas kini sa mga patakaran ug pamatasan sa organisasyon. Sa pagkakaron, gipaabot nga mopadayon ang Philippine Army sa ilang pagsusi ug imbestigasyon aron mahibal-an kung adunay lig-on nga basehan alang sa posibleng pagtangtang kang Padilla isip reservist.
Samtang, nanawagan si kanhi Interior Secretary Rafael Alunan III nga tangtangon si Padilla isip senador ug reservist, tungod sa iyang pagtuo nga dili angay magpabilin sa posisyon ang usa ka opisyal nga giakusahan nga adunay pagtuo nga sukwahi sa interes sa estado. Wala pa magpagawas og pahayag si Padilla isip tubag sa lakang sa Department of National Defense may kalabotan sa maong isyu.
