Wala naghatag ang Department of Foreign Affairs og dugang detalye sa kahimtang ug eksaktong nahimutangan ni kanhi Ako Bicol party-list Rep. Zaldy Co, nga gikataho nga anaa sa France samtang nag-atubang og mga kaso nga may kalabotan sa giingong anomalya sa flood control projects.
Atol sa deliberasyon sa proposed budget sa DFA, gipangutana ni Akbayan party-list Rep. Perci Cendaña ang kahimtang ni Co sa France ug kon adunay timeline sa iyang pagbalik sa Pilipinas aron atubangon ang mga kaso.
Matud ni Misamis Occidental Rep. Sancho Fernando Oaminal, nga sponsor sa DFA budget, dili mahimong ipaambit sa ahensya ang maong detalye tungod kay confidential kini ubos sa French law ang asylum applications.
Bisan pa niini, gipasiugda ni Cendaña ang papel sa DFA sa pagtabang nga mapauli sa Pilipinas ang mga tawo nga anaa sa gawas sa nasod aron maatubang ang ilang mga kaso.
Si Co kauban nga akusado ni kanhi House Speaker Martin Romualdez sa ₱7.4-bilyong plunder case nga gipasaka sa Ombudsman sa giingong kickback scheme sa mga government infrastructure projects, lakip ang flood control.
Kahinumdoman nga mibiya sa nasod si Co kaniadtong Hulyo 2025 ug wala na kini mibalik sa Pilipinas.
