Gipalig-on sa Davao City Police Office o DCPO ang mga operasyon sa mga border checkpoint sa siyudad aron masiguro ang estrikto nga pagsunod sa mga protocol ug mapadayon ang operational readiness sa kapulisan.
Gipangulohan ni PCOL Peter B. Madria, City Director sa DCPO, ang pagpalig-on sa operasyon niadtong Setyembre 15, 2026, ilabi na sa Lasang Border Control Point ubos sa Area of Responsibility o AOR sa Police Station 6-Bunawan, nga nahimutang sa Barangay Lasang Road, Bunawan, Davao City.
Gipakusgan usab ang operasyon sa Calinan Border Control Point ubos sa AOR sa Police Station 10-Calinan isip kabahin sa mga paningkamot sa kapulisan nga mapanalipdan ang mga entry ug exit points sa siyudad.
Human sa maong operasyon, mipahigayon usab og courtesy visit ang DCPO leadership sa Task Group Lawin sa Barangay Lasang ug Task Group Condor sa Braganza, Barangay Lacson, nga kabahin sa TF-Davao, 10th Infantry “Agila” Division sa Philippine Army.
Pinaagi niini, gipalig-on pa ang koordinasyon ug kooperasyon tali sa DCPO, TF-Davao ug Philippine Army, ilabi na sa pagdumala sa mga border control points.
Matod ni PCOL Madria, dili lamang importante ang mga checkpoint sa pagsiguro nga masunod ang mga protocol, kondili epektibo usab kini nga deterrent batok sa kriminalidad.
Pinaagi sa estrikto nga checkpoint operations, mas dako ang kahigayonan nga mapugngan ug masakpan ang pagdala sa mga kontrabando, smuggled cigarettes, ilegal nga droga ug uban pang gidili nga mga butang nga mahimong hulga sa seguridad sa mga komunidad.
Busa, gipasalig sa DCPO nga magpadayon ang ilang koordinasyon uban sa TF-Davao ug Philippine Army aron masiguro ang disiplinado nga operasyon sa mga checkpoint, mapugngan ang kriminal nga mga kalihokan, ug mapadayon ang kalinaw ug kahapsay sa Davao City.
