Nagpatuman ang Department of Education (DepEd) og mas hugot nga silot batok sa mga estudyanteng nalambigit sa seryosong bullying, pamisikal, ug uban pang binuhatan nga makapeligro sa kaluwasan sa eskwelahan.
Gilatid sa DepEd Order No. 006, s. 2026, o Guidelines on Ensuring a Safe and Motivating Learning Environment (ESMLE), ang nagkalain-laing silot depende sa kabug-at ug pagbalik-balik sa paglapas.
Alang sa serious offenses sama sa balik-balik nga bullying ug online harassment, mahimong ipatuman ang hangtod lima ka adlaw nga suspension ug referral sa Department of Social Welfare and Development (DSWD) sa unang paglapas. Samtang posible ang non-readmission sa ikaduha ug exclusion sa ikatulo.
Sa high-risk acts sama sa grabeng pisikal nga pag-pangabuso, bomb threat ug peligroso nga hoaxes, mahimong ipatuman ang non-readmission sa unang paglapas, permanenteng exclusion sa ikaduha ug referral sa mga awtoridad.
Matud ni Education Secretary Sonny Angara, dili ikompromiso sa DepEd ang kaluwasan sa mga estudyante bisan pa og hatagan og higayon ang mga nakalapas nga mausab ang ilang binuhatan.
Ang school head mahimong magpatuman og hangtod 30 ka adlaw nga preventive suspension samtang gina-imbestigahan ang kaso kung ang estudyante giila isip nga hulga sa kaluwasan sa campus.
